SABÍAS QUE ...

Hai unha expresión " Tes máis conto que Calleja! " , que se convertiu nunha frase popular e estendida por toda España ata hai moi pouco e que mesmo hoxe se segue usando.

Adoita significar que certas razóns, explicacións ou desculpas que nos dan, ou certos comportamentos, soan a falsos, ou cando menos a fantasiosos. De aí o comparativo de: "... máis que Calleja. "

Pero, quen era ese Calleja? Ben, pois todo un cabaleiro ,Saturnino Calleja Fernández, nacido en Quintanadueñas -Burgos- (1.855-1.915), propietario dunha editorial de contos para nenos. Quizais a de máis arraigamento en toda a historia do editorialismo español.

Don Saturnino Calleja, publicou unha innumerable cantidade de contos escritos especialmente para nenos e mozos. Eran edicións moi coidadas, que se alternaban con outras máis populares e baratas, pero sempre ben presentadas.

Os textos recollían, convenientemente "arranxados" para non aburrir ou asustar aos nenos lectores, tradicións anónimas, clásicos dos irmáns Grimm, ou das "Mil e unha noites", etc. Pero tamén outros textos inéditos, que sen firma ou tan só figurando unhas simples iniciais, eran escritos especialmente para Calleja.

Xunto a eles, e de xeito igualmente case anónima, asinando só coas súas iniciais, a Editorial Saturnino Calleja contou cunha case lexión dos grandes debuxantes da época, que encheron coas súas ilustracións, de magnífica calidade, cada edición dos seus contos.

Como vedes, moitas das expresións que utilizamos teñen unha explicación que nace da intelixencia e tamén, en moitas ocasións, da picardía da xente do pobo.