Este blog marcha de vacacións, pero o vindeiro curso prometemos estar aquí con máis contidos, emocións, sorpresas e todo o que vós queirades.
Queremos agradecervos, desde o Equipo da Biblioteca, a vosa colaboración e complicidade, tamén o voso traballo e ilusión. Os libros, coas súas historias, e a biblioteca, non teñen sentido sen ese marabilloso voluntariado, os usuarios e usuarias, a Comunidade de Booktubers, os conta contos...
A derradeira imaxe deste curso é para o Club Lector Tusitalas. Grazas polas palabras compartidas!
Que teñades un feliz verán. Cheo de risas e libros!!!
Desde a biblioteca do noso colexio, queremos agradecer cada ano a participación nesta Comunidade de Booktubers, que tantas e boas recomendacións lectoras facedes.
Con seguridade, un dos agasallos máis fermosos é recomendar un libro ás compañeiras e compañeiros. Ese libro, co que pasamos horas desfrutando entre personaxes, aventuras, risas, e tamén que nos levan moitas veces a reflexionar ou pensar sobre temas dos que, ao mellor, non nos decatáramos da importancia que teñen nas nosas vidas.
Esta semana no blog, van as últimas recomendacións deste curso, a cargo dos compañeiros Aris, Elvis, Duarte e Gabriel. Pero fostes moitas as persoas que nos acompañastes ao longo destes meses, descubríndonos novas e interesantes lecturas, por todo iso, MOITAS GRAZAS!!!
Queremos rematar esta semana das Letras Galegas cantando. Así que escollemos a última canción das Tanxugueiras. Que mellor xeito de manter viva a lingua galega que falando en cantando en galego!
Este ano, imos coñecer un pouco da historia desta data de celebración, o Día das Letras Galegas, xa que a persoa á que está dedicada tivo moito que ver coa decisión.
O 20 de marzo de 1963, tres membros da Real Academia Galega, Manuel Gómez Román, Xesús Ferro Couselo e Francisco Fernández del Riego (ao que se lle dedican este ano) presentaron a proposta de celebrar o 17 de maio o Día das Letras Galegas. Pensaron que o poemario de Rosalía de Castro era a primeira obra importante da literatura galega contemporánea, é dicir, considerábana a primeira obra do chamado Rexurdimento (periodo da literatura galega que abarca desde 1863, data de publicación de Cantares Gallegos de Rosalía de Castro, a 1916, ano de fundación das Irmandades de Fala):
Aínda que non se coñece a data real da publicación do libro de Rosalía, elixiron ese día pola dedicatoria autógrafa da autora á tamén escritora Cecilia Böhl de Faber. E, para conmemorar o primeiro Día das Letras Galegas, publicouse unha edición critica de Cantares Gallegos, feita polo tamén escritor e estudoso, Fermín Bouza Brey.
A festividade tivo moito éxito e desde ese día, cada ano, celebramos o 17 de maio o Día das Letras Galegas, coa única condición de que, a persoa á que homenaxeamos, teña pasado un mínimo de dez anos desde a data do seu falecemento.
Nestes sesenta anos, só se lle dedicou este día a cinco mulleres e, desde este blog, queremos reivindicar a todas as que o merecen, xa que habelas hainas!
Aquí vos deixamos un vídeo que conta como empezou todo!!!
O 1 de maio foi o día do cómic, e nós queremos facerlle a nosa pequena homenaxe. Hoxe veremos unha pequena e interesante historia da Banda Deseñada Galega, e nos vindeiros días, a nosa Comunidade de Booktubers recomendan algúns cómics de interese.
